No Backstage do 59 segundos desta semana tiven ocasión de cruzar unhas verbas con Carod Rovira, a quen non coñecía, e volver saudar a Joseba Azcárraga, o conselleiro de xustiza vasco, con quen teño coincidido en varios programas e sempre lle escoitei dicir cousas interesantes e dicilas con elegancia. É o que pasa en Madrid. Os que temos certa querencia nacionalista acabamos arrexuntándonos para que non nos pase nada e se pasa algo, poder botarnos unha man.
O tema do día era a famosa cacería de Garzón e Bermejo e a foto de Rajoy con toda a dirección popular en plan Fuenteovejuna, todos a una contra o Comendador Garzón. Unha de cousas que cando falas delas alí teñen sentido e parecen moi importantes, e cando volves á casa te percatas de que so teñen sentido e son importantes en Madrid.
As eleccións galegas espertan pouco interese porque, segundo me contaron, ate en Xénova, a sede popular, as dan por perdidas e confían pouco nas posibilidades de O Noso Alberto.
Camiño do plató cruceime con Fraga. Coma sempre nos saudamos educadamente. Hai que recoñecer que so unha forza da natureza coma el pode seguir aínda en pe. Pero como dixo unha vez Dionisio Ridruejo de Fernández de la Mora: tanta intelixencia ó servicio de nada
