Caderno de bitácora.. Data estelar 2010. 12. 18

Levo recibido certos avisos e mensaxes de amigos sobre as respostas provocadas polo meu apunte sobre o famoso debate lingüístico, que algúns quixeran converter nunha caza de bruxas. Repasei con interese e respecto moitas das aportacións feitas. Velaí alguns detalles máis a modo de resposta breve.

O primeiro é dárllelas grazas a todos quén me fixeron notar os erros e fallos na escrita, debidos á miña ignorancia e a certa impericia no manexo dos teclados virtuais. O que non aprende é porque non quere. Con tan bos mestres, seguro que algo acabarei mellorando.

O segundo é manifestar, por se non quedara claro, o meu total acordo e absoluto apoio ás teses que defende o documento de Monteagudo e Reixa. Porque é unha achega chea de intelixencia, pensamento estratéxico e claridade na análise e nos obxectivos que define. Algo de tanto valor nun pais onde tan verdade se fai o dito por Goethe sobre que somos todos tan limitados, que creemos sempre tér razón. Á parte, son bos amigos.

O terceiro é constatar algo observado fai tempo. Cada vez custa máis traballo distinguir algúns comentarios que se deixan en foros e espazos creados para celebrar o pluralismo nacionalista, dos comentarios deixados regularmente en foros e sitios da máis rancia ultradereita neoespañolista. O mesmo ton matonil, as mesmas descualificacións de puticlub, as mesmas acusacións inquisitoriais e o mesmo principio fundamental: quén discrepe ou é ignorante, ou é un traidor, ou é un colaboracionista, ou é un corrupto.

Non é que me moleste, nin me importe. É que me aburre soberanamente. Amor e paz, irmáns.

Caderno de bitácora. Data estelar 2010. 12. 15

Veño de ler o tostonazo que despacha Paco Rodríguez sobre o debate que ten suscitado o informe lingüístico do IGEA. Fíxeno porque mo pediu un amigo. Con todos os respectos, fai tempo que Rodríguez me aburre soberanamente e non me interesa nada do que di.

Non vou entrar no fondo do debate, porque tamén fai moito que decidín non equivocarme de inimigo e non perder mais tempo en discusións ao estilo dos bispos de O Nome da Rosa.

En troques, sí quero dicir unha cousa moi breve sobre o trato repunante que dispensa a persoas tan respectables como Monteagudo ou o meu amigo Antón Reixa. So quero dicir que estou farto de aturar tanto ese tipo de discurso como a quen o subscribe. Aburren ás ovellas e sáelles o noxo polas orellas. A ver se imos madurando e afacéndonos a debater sobre as ideas e deixámonos de andar á caza e catura das persoas. A ver se empezamos a saber rebater argumentos con argumentos mellores e non con descualificacións e medias mentiras contra das persoas.

Que xa imos vellos todos para isto. Ou?

caderno de bitácora, data estelar 2010.12.13.

Estes ainda non se enteraron de cómo as gasta Esteban González Pons cando se pón a destapar a Verdade (con maíusculas)  e a sacar a luz as conspiracións, que tamén están aí fóra.....

CAMBIOS NO BLOG, AMIGUIÑOS

Dende hoxe, o blog empeza unha nova etapa aproveitando que é luns e aprendin a vincular como é debido as contas de twitter. Por si a alguén lle interesa, que non cre, estas son as novidades.

Dende hoxe, por regla xeral, os enlaces á artigos so se publicaran no E DIGO EU .. via twitter.

As anotacións como entradas do Blog serán propias e perpetradas adrede para o sitio e non referencias a cousas e pezas publicadas noutros medios de comunicación.

Saúde e República.